Fee
Reega
22 DE XUNETU
El 22 de xunetu Una Señora Fiesta va ser testigu de la presentación de Zoom, nuevu LP de Fee Reega, la ocasión ideal de participar nuna esperiencia única, dende l’otru llau del qu’afina les vides del so carrusel de personaxes xixoneses.
Alquimista de la pulsión folk, nel trabayu que nos va presentar, la compositora alemana texó un mural en cinemascope con arremangu fronterizu y soníos cuspíos, con referencies dende Kurt Weill a Kurt Vile.
Mancadures y cicatrices del alma cuayaes equí dende un prisma de güeyada caleidoscópica, pero siempres enfocada dende la unicidá de los cantares envenenaos dulcemente por Fee, capaz d’abrir vetes nel espaciu-tiempu hacia what if? tan suxerentes como una mutación astur-suabiana de Mazzy Star o’l suañu imposible d’unos Flying Saucer Attack de condición norteña. Fee Reega y la so potente banda van ufiertar un directu con tol so espectru emocional y musical: la orquesta de pueblu de Twin Peaks.
Xurxo Fernandes
22 DE XUNETU
Xurxo Fernandes fórmase dende mui nuevu en baille y cantu tradicional, entamando en 1994 un trabayu de campu per aldees de Galicia. Esto entemezlo averándose a les sonoridaes propies de les comunidaes sefardíes, polo que percuerre parte del mundu con proyectos como Jako el Muzikante.
Como músicu y intérprete, crea Radio Cos, proyectu musical col qu’espubliza dos discos y nel 2016 representa a España nel prestixosu festival de músiques de raigañu WOMEX. Nesta última década dirixe otru proyectu musical colectivu, Pandeireteiras sen Fornteiras y llanza un EP llamáu Altaplana, acompañáu por Pedro Lamas. En 2021, la mestura de tol so bagaxe sigue na busca d’esta conexón única, con una sonoridá peculiar: Levaino!
La
Plazuela
22 DE XUNETU
La Plazuela ye un grupu caracterizáu pola reinvención del Flamencu orixinariu de Granada. La formación compónenla Manuel Hidalgo Sierra (1998) y Luis Abril Martín (1998). Pa La Plazuela la so denomación d’orixe ye crucial: la cultura popular andaluza y n’especial la granadina. Y fáenlo al traviés de la vindicación del so raigañu con un discursu actual y anováu que tien como conteos principales el flamencu, la música electrónica y el nu funk.
Tolos xéneros musicales caben na ciudá de l’Alhambra y, asina La Plazuela bebe de toos ellos al traviés de la so esencia flamenca; asitiándose como banda xeneracional, qu’espeya la creatividá d’una escena que nun se plantega casar con un estilu solo. Y ye que’l flamencu ye’l xéneru musical de la cai por escelencia; un xéneru urbanu cola capacidá d’impregnar col so imaxinariu y los sos sones tolo que toca.
Wonderbraz
DJ
22 DE XUNETU
Directa dende Bretaña llega pa zarrar la fiesta DJ Wonderbraz. Baxo esti alcuñu alcuéntrase la francesa Yuna Le Braz, que lleva venti años meciendo tou tipu de músiques del mundu qu’atopa nos sos viaxes. Ayalgues xenuines, oxetos de coleccionista, pieces electro-exótiques, melodíes de hip hop infrecuentes, cócteles de música étnica que son fueu garantizáu na pista de baille.
Aguiyada pol so instintu y pol so ampliu conocimientu musical, Wonderbraz entemez y harmoniza con naturalidá distintos sones de tol planeta.
Una investigadora interesada na llibre circulación de los artistes y de les distintes formes musicales, Wonderbraz ye muncho más qu’una mensaxera, ye toa una activista cultural.