ENTRUGUES FRECUENTES USF25

¿Cuándo se celebra Una Señora Fiesta 2025?

¿Tu tamién tienes dudes cola fecha del festival? Hai dalguna confusión, sobre too ente les persones que venís de fuera, col mes de xunetu (julio en castellanu), porque suena más a xunu (junio). Una Señora Fiesta ye’l 25, 26 y 27 de xunetu, el mes de la yerba.

¿Ónde se celebra?

Esti añu hai tres xornaes de fiesta y dos llugares onde se van celebrar. Per un llau ta Vegarrionda, onde va facese’l Filandón del vienres y la romería del domingu. Y per otru, el Teatru de La Benéfica en L’Infiestu.

Pa llegar a L’Infiestu dende Uviéu tenéis autobuses y la llinia C6 de cercaníes Renfe (l’antigua Feve). P’averate a Piloña dende Xixón tamién hai buses (tren non).

Pa llegar a Vegarrionda, que ye un pueblu de Piloña a 7 kilómetros de la capital, L’Infiestu, nun hai tresporte públicu, polo que ye preciso buscar otres alternatives pa llegar.

Si queréis compartir coche, etiquetáinos nes histories d’Instagram y compartimos pa xenerar grupos.

¿Ye posible acampar n’Una Señora Fiesta?

Esti añu nun vamos contar con zona d’acampada pa los tres díes, yá que cada actividá concíbese per separao y en diferentes partes del conceyu de Piloña. Queremos proponer, como siempre, una alternativa d’ociu que promueva’l cuidáu de la contorna y del paisaxe, como tamién eventos culturales que nun nos lleven a consumir un llugar hasta sumilu. Esto paeznos incompatible con una zona d’acampada nun prau tres díes.

¿Hai romería pel día?

Sí, claro qu’hai romería, el domingu 27 de xunetu a partir de les doce la mañana celébrase una romería d’accesu llibre en La Bilortera, en Vegarrionda. Tenéis que traer la comida de casa y la bébora podéis mercala ellí.

¿Sírvese comida y bébora n’USF25?

N’Una Señora Fiesta va haber chigre tanto na xornada del sábadu nel Teatru La Benéfica yá que va tar abierta la barra de “La maléfica” como nel prau de La Bilortera’l domingu onde va ponese cerveza artesano Ordum, sidra Viuda d’Angelón y xinebra Orbayu, too producción local. Tenemos unos vasos de policarbonatu llavables y retornables pa xenerar la menor cantidá de residuu posible: cobramos 3 € por ellos y volvémosvos el dineru cuando traigáis el vasu de vuelta. Nun va haber comida. Nun va haber comida.

¿Pue pagase con datáfonu o Bizum?

Como somos unes modernes, esti añu tenemos datáfonu. Nel Teatru de La Benéfica va poder pagase con tarxeta y de mano en La Bilortera tamién pero, y esti “pero” ye lo más importante d’esti párrafu, ye una zona rural onde la cobertura ye bien inestable. Asina que primero de subir a la romería de Vegarrionda, pasái pel caxeru en L’Infiestu.

¿Qué necesito llevar? Imprescindibles

✔ Calzáu
✔ Llinterna o frontal
✔ Comida
✔ Sombriella
✔ Siella

¿Hai baños?

Sí, hai baños portátiles tanto na zona de romería como nos conciertos.

¿Admítense perros?

Aconseyamos nun dir con perros a Una Señora Fiesta, porque nun ye l’ambiente más apropiao, pol ruiu y el númberu de xente, nin de bienestar pa los nuestros amigos de cuatro pates.

Y una petición mui importante: hai que dexalo too tan llimpio como lo atopamos. Utilizái les papeleres, nun tiréis chapes nin cristales y traéi un estuche pa la paba de los pitos.

Nun se van a tolerar comentarios, actitúes y/o conductes violentes, racistes, xenófobes, sexistes nin discriminatories. La organización resérvase’l derechu a denegar l’accesu y permanencia a les persones que tengan conductes qu’afecten al disfrute del restu d’asistentes.