ENTRUGUES FRECUENTES USF23
¿Cuándo se celebra Una Señora Fiesta 2023?
¿Tu tamién tienes duldes cola fecha del festival? Hai dalgún enguedeyu, sobremanera ente les persones que venís de fuera, col mes de Xunetu (Julio n’asturianu), porque suena más a Junio (Xunu). Una Señora Fiesta 2023 ye’l 22 de Xunetu, 22 de Julio, el mes de la yerba y, esti añu, el día enantes de les elecciones.
¿Cómo llegar a Vegarrionda?
Vegarrionda ye una aldea del conceyu asturianu de Piloña, a 7 quilómetros de la capital, L’Infiestu. Nun hai tresporte públicu, polo qu’hai que buscar otres alternatives pa llegar. A L’Infiestu llega’l tren y l’autobús. Si queréis compartir coche etiquetáinos nes hestories d’Instagram y compartimos pa xenerar grupos.
¿Ye posible acampar n’Una Señora Fiesta?
Sí, ye posible acampar la nueche del sábadu, pero non el vienres. Si vais quedar a dormir dempués de los conciertos tenéis dos posibilidaes:
- Si venís en furgoneta, tenéis qu’usar la zona d’aparcaderu.
- Si vais llantar tienda de campaña, hai una finca preparada p’acampar, cruciando la ponte.
Toles zones van tarde bien señalizaes y amás, nel nuesu web tenéis un mapa coles llocalizaciones principales.
Pidímosvos que dexéis la zona d’acampada a lo llargo’l domingu. Son praos que nos empresten, y nun podemos quedar a pernoctar la nueche del domingu 23 al llunes 24.
¿A qué hora empiecen los conciertos d’Una Señora Fiesta?
Vamos tentar de ser puntuales y entamar los conciertos a les 22.00 hores. L’apertura de puertes ye a les 21.00 hores. Nun somos estrictos colos horarios de cada conciertu, pa dexar llibertá a los artistes y que l’equipu técnicu pueda facer el so trabayu.
¿Hai romería pel día?
Sí, a partir de les doce, celébrase una romería d’accesu libre en La Meredal. Tenéis que trayer la comida de casa y la bebida podéis comprala nel chigre de Maribel. Nun traigáis coses desechables pa nun xenerar basoria.
¿Sírvese comida y bebida nos conciertos?
N’Una Señora Fiesta va haber serviciu de bar con cerveza artesano Ordum, sidra Viuda d’Angelón y xinebra Orbayu, too producción llocal. Tenemos unos vasos de policarbonatu llavables y retornables pa xenerar la menor cantidá de residuu posible: cobrámosvos 3 € por ellos y devolvémosvos el dineru cuando nos trayéis el vasu de vuelta. Tamién va haber comida, de la mano del equipu de Taberna Narciso, que va tar n’USF’23 con riquísimes propuestes gastronómiques, tamién veganes .
¿Pue pagase con datáfonu o Bizum?
Nun ye posible pagar con tarjeta nin Bizum, porque malpenes hai cobertoria móvil de datos. Sólo s’almiten pagos en metálicu. Asina que pasái pel caxeru en L’Infiestu enantes de tirar pa Vegarrionda.
¿Qué necesito llevar? Imprescindibles
✔ Calzáu cómodo
✔ Llinterna
✔ Comida pal mediudía
✔ La entrada impresa o descargada ya nel móvil, yá que malpenes hai conexón 4G
✔ Una botellina reutilizable pal agua
¿Hai baños?
Sí, hai baños portátiles tanto na zona de romería como nos conciertos.
¿Almítense perros?
Aconseyamos nun acudir con perros a Una Señora Fiesta, porque nun ye l’ambiente más afayadizu, pol ruiu y el númberu de xente, nin de bientar pa los nuesos amigos de cuatro pates.
Y un pidimientu importantísimu: hai que lo dexar too tan llimpio como lo alcontremos. Utilizái les papeleres, nun tiréis chapes nin cristales, y trayéi un estuxu pa les colíes de cigarru.
Nun se van tolerar comentarios, actitúes y/o conductes violentes, racistes, xenófobes, sexistes nin discriminatories. La organización resérvase’l drechu de torgar l’accesu y permanencia de les persones que caltengan conductes que fadien o afecten al esfrute d’otros asistentes.